Tarín Conde trátase dun proxecto que une á cantante cubana Diana Tarín e ao pianista e compositor galego Alberto Conde, e no que o Jazz serve de catalizador dunha variedade de acentos e pulos que abrollan do primeiro alento da personalidade destes dous artistas, en tal maneira que se plasman nunha música universal a poder das súas fondas raiceiras.

Esta iniciativa musical ten como principal obxectivo actualizar os lazos afectivos entre Galicia e Cuba, creando unha ponte musical entre América e a Península Ibérica. Para iso, o seu repertorio céntrase en temas de «ida e volta» –cancións que, sendo tipicamente cubanas ou galegas, conectan coa sensibilidade de ambas as culturas (como «Para Vigo me voy» de Lecuona ou «Unha noite na eira do trigo» de Chané e Curros)– xunto con outros temas populares galegos que materializan este vínculo.

Ao longo de cinco anos, esta idea inicial evolucionou ata converterse no proxecto audiovisual «Corrente do Golfo: Unha viaxe da alma». Este proxecto audiovisual rende homenaxe a figuras como María Muñoz Portal e Federico García Lorca, destacando o seu papel no recoñecemento da raíz afrocubana na cultura cubana, especialmente na música, e a súa conexión co xurdimento do jazz afrocubano.

O repertorio do proxecto non se limita a este núcleo, senón que se amplía con melodías e textos doutras tradicións musicais próximas e mestizas, como as de América do Sur e Portugal. Alberto Conde, director da iniciativa, compuxo novas cancións pensadas para a voz e o estilo de Diana, con letras especialmente escritas ou tomadas da tradición literaria dese universo cultural, como a inédita «Ronda/Fuga/Danzón», con letra baseada en ideas poéticas de Guillermo Cabrera Infante. Ademais, inclúense temas en inglés da corrente principal do jazz, tamén con novas composicións de Alberto Conde.