Esta é a proposta innovadora que marca a diferenza con outros traballos de adaptación de poemas e que pon de manifesto a versatilidade do galego como lingua integradora ao fusionarse de xeito natural con ritmos e cadencias que a priori lle son alleos.

Desexamos que este material sirva para iniciar un camiño no que as artes sexan o escaparate e exemplo de que nunha sociedade aberta e consciente da súa historia, a convivencia e a tolerancia son os vehículos que permiten a integración e que con este respecto á diversidade os seus máis destacados representantes culturais puideron manter vivas as tradicións e facer delas o legado cultural de Galicia na emigración.